दिव्यांगांच्या समस्यांसाठी “दिव्यांग कल्याण विभाग दिव्यांगाच्या दारी”

पिंपरी, दि. २० (महाराष्ट्र मंथन):- पुणे जिल्हयात विविध विभागातील कार्यान्वित असलेल्या विविध योजनांचे लाभ दिव्यांग बांधवांना देण्यासाठी मंगळवार दि. २२ ऑगस्ट, २०२३ रोजी सकाळी ११.०० वाजता प्रा. रामकृष्ण मोरे प्रेक्षागृह, चिंचवड, पुणे येथे भव्य कार्यक्रमाचे आयोजन करण्यात आल्याची माहिती पिंपरी चिंचवड महानगरपालिकेचे आयुक्त श्री शेखर सिंग यांनी दिली.

महाराष्ट्र शासन, दिव्यांग कल्याण विभागाचा शासन निर्णय दिनांक २३ मे, २०२३ नुसार “दिव्यांग कल्याण विभाग दिव्यांगाच्या दारी” हे अभियान राबविण्यात येत आहे. तसेच महाराष्ट्र शासन, दिव्यांग कल्याण विभागाचा शासन निर्णय दिनांक २८ जुलै २०२३ नुसार हा कार्यक्रम राबविण्यात येणार असल्याचे सिंग यांच्याकडून सांगण्यात आले.

मुख्य मार्गदर्शक ओमप्रकाश उर्फ बच्चू कडू, विधानसभा सदस्य, अध्यक्ष व मुख्य मार्गदर्शक राज्यस्तरीय समिती (मंत्री दर्जा) यांच्या प्रमुख उपस्थितीत राहणार आहे.

यावेळी विविध विभागांचे स्टॉल लावले जाणार असून उपस्थित दिव्यांग बांधवांची नांव नोंदणी, मार्गदर्शन, योजनांच्या लाभाची प्रक्रिया पद्धती इ. वर संवाद केला जाणार आहे.

पिंपरी-चिंचवड महापालिका हद्दीतील जास्तीत जास्त दिव्यांग बांधवांनी या कार्यक्रमात सहभागी व्हावे असे आवाहन महापालिकेचे आयुक्त तथा प्रशासक शेखर सिंह यांनी केले आहे.