शफीक शेख, महाराष्ट्र मंथन संपादक
निगडी, दि. २५ : दुर्गा टेकडी परिसरात उभारण्यात येणाऱ्या प्रस्तावित कचरा प्रक्रिया प्रकल्पाविरोधात स्थानिक नागरिकांमध्ये तीव्र संतापाचे वातावरण निर्माण झाले आहे. या प्रकल्पाला विरोध दर्शवण्यासाठी उद्या, रविवार दिनांक २५ ऑक्टोबर २०२६ रोजी सायंकाळी ठीक ५ वाजता नागरिकांनी मोठ्या संख्येने एकत्र येण्याचा निर्णय घेतला आहे. हे आंदोलन दुर्गा टेकडी बस स्टॉपसमोर, दुर्गा टेकडीच्या कमानीजवळ, निगडी जलशुद्धीकरण केंद्र, सेक्टर क्रमांक २३, निगडी मेन रोड गेटसमोर होणार आहे.
प्रकल्पाचे स्वरूप: दुर्गा टेकडीवरील सुमारे २५ एकर जागेवर २७ मेगावॅट क्षमतेचा कचरा प्रक्रिया प्रकल्प उभारण्याचे प्रस्तावित आहे. या प्रकल्पात दररोज सुमारे १,००० मेट्रिक टन कचऱ्यावर प्रक्रिया करून वीजनिर्मिती करण्याचे नियोजन प्रशासनाकडून केले जात असल्याची माहिती समोर आली आहे.
नागरिकांचा विरोध का? प्रस्तावित प्रकल्पामुळे निर्माण होणाऱ्या विविध समस्यांवर नागरिकांनी बोट ठेवले आहे:
मोठ्या प्रमाणावर हवाप्रदूषण वाढण्याचा गंभीर धोका.
परिसरातील नैसर्गिक पाण्याच्या स्रोतांवर प्रतिकूल परिणाम होण्याची शक्यता.
स्थानिक रहिवाशांच्या आरोग्यावर थेट दुष्परिणाम.
टेकडीच्या नैसर्गिक पर्यावरणाला आणि हरित क्षेत्राला मोठा धोका.
प्रचंड प्रमाणातील कचरा प्रक्रियेमुळे स्थानिक रहिवाशांच्या दैनंदिन जीवनमानावर होणारा परिणाम.
सांगलीच्या लढ्याचा दिला दाखला: या संदर्भात सांगली येथील कचऱ्यापासून वीजनिर्मिती करणाऱ्या १० मेगावॅट प्रकल्पाचा संदर्भ देण्यात आला आहे. तेथे चार गावांतील नागरिकांनी एकत्र येऊन दिलेल्या लढ्यामुळे अखेर तो प्रकल्प बंद करावा लागला होता. सांगलीच्या तुलनेत दुर्गा टेकडीवर प्रस्तावित असलेल्या २७ मेगावॅट प्रकल्पाचा आकार आणि व्याप्ती कितीतरी पटीने मोठी असल्याने धोका अधिक असल्याचा इशारा देण्यात आला आहे.
नागरिकांना सहभागाचे आवाहन: हा लढा केवळ एका सोसायटीचा नसून संपूर्ण परिसराच्या पर्यावरणाचा, मुलांच्या आरोग्याचा आणि भावी पिढ्यांच्या सुरक्षित भविष्याचा आहे. त्यामुळे केवळ घरात बसून चालणार नाही, तर प्रत्येक सोसायटीतील जास्तीत जास्त रहिवाशांनी आपल्या कुटुंबासह या आंदोलनात वेळेत सहभागी व्हावे, असे कळकळीचे आवाहन आयोजकांकडून करण्यात आले आहे.
